Untaton ang Pulitikal nga Repyesyon kag Hilwayon si Iver Larit sa Gilayon!

Ang pa-traidor nga pag-aresto kahapon kay Iver Larit, isa ka liason officer sang United Negros Drivers and Operators Center (UNDOC)  isa ka maathag nga dagway sang mapintas kag  kontra-pumuluyo  nga gobyerno. Wala ini kinalain sa Martial Law nga sa diin nagapinagusto na lamang pangdakop ang PNP kag AFP sang mga inosente nga sibilyan gamit ang husgado kag piskalya nga ila madiktahan.

Si  Iver Larit nga residente sang Brgy. Mansilingan, Bacolod City ginpatu-patuan  sang  AFP kag PNP sang kaso nga robbery-in-band nga  kahimuan kuno sang New People’s Army (NPA) sa Northern Negros. Bilang isa ka aktibo nga katapu sang progresibo nga organisasyon sang mga drayber, siya target sang planado kag sistematiko nga atake sa idalum sang Oplan Bantay Laya sadto kag Oplan Bayanihan sa subong. Indi man gani iya ngalan ang ara sa Warrant of Arrest. Ang pag-angot sa iya  kag iban pa nga inosente sa NPA indi na bag-o nga patakaran sa pagpatuman sang Counter Insurgency Plan.

Bangud napaslawan ang AFP kag PNP  sa ila kampanya kontra-insureksyon, nagapakahapos na lamang ang ila intelligence officers ilabi na sang 303rd Brigade PA nga mag-insert sang mga ngalan sang mga aktibo nga mga organizer, member,  mass leader o supporter sang people’s organizations sa mga kriminal nga kaso. Isa ini ka makatalagam nga sitwasyon sa idalum sang Aquino nga rehimen,  sa diin, indi na madistinger sang AFP ang armado nga NPA sa bukid sa mga aktibista sa kasyudaran nga ila ginalista sa ila Order of Battle para dakpon, patyon o pasakaan sang himo-himo nga kaso.  Ginagamit nila ang bayaran o sunod-sunoran nga mga  testigo/complainant nga kalabanan ara sa idalum o operatiba na sang AFP. Sa tuyo nga mapapanaog dayon ang warrant batuk sa mga akusado, gina-maniobra ang mga sub-poena nga indi maserbe o ginagamit ang maki-militar kag balingag nga mga huwes para magpirma sa mga warrant nga wala sang preliminary investigation. Matingkad man ang “planting of evidence” kaangay sang granada o pusil para sa dugang nga kaso.

Ang UNDOC nagakabalaka nga sa pagsingki sang mga operasyon sang NPA kag sa paglala sang kapaslawan sang AFP/PNP batuk sa armado nga rebolusyonaryo nga hublag,  ang mga inosente  nga drayber, kabataan-istudyante, imol nga taga-syudad, development workers kag iban pa nga inosente ang ila na lamang ipapatay o pasakaan sang mga himo-himo nga kaso, dakpon kag paantuson sa bilangguan lakip na ang mga pamilya sang biktima. Isa man ka tinutuyo sang AFP/PNP sa idalum sang Oplan Bayanihan amo ang pagwasak kag pagnyutralisa sang mga progresibo nga organisasyon pareho sang UNDOC, nga para sa ila “masabad” kag magahod bangud nagahublas kag nagapamatuk sang kontra-pumuluyo nga mga programa kag polisiya sang maki-dumuluong nga gobyerno. Saksi ang pumuluyo nga nangin consistent ang UNDOC sa pagpamatuk sang polisiyang liberalisasyon, deregulasyon kag pribatisasyon sa industriya sang langis sa Pilipinas.

Pila pa ka inosente nga sibilyan ang ilupot sa prisohan? Ini bala ang “Matuwid na Daan”? Sobra-sobra na! Tama na! Ini  pagpadayon lamang sang isa ka bulok, mapiguson kag kontra-pumuluyo nga sistema para mapahipos ang pumuluyo samtang nagalala ang gutom kag kaimulon kag pagka-inutil sang gobyerno nga ginaharian sang dalagku nga mga kapitalista kag agalon may duta. 

FREE IVER LARIT NOW! FREE ALL POLITICAL DETAINEES! JUSTICE FOR ALL VICTIMS OF POLITICAL REPRESSION!

ROMMEL SANTILLAN | CHAIRMAN | UNDOC