Ang Atong Mga Sapa: Tinubdan sa Kinabuhi, Gigikanan sa Kaliwatan, Kaugmaon sa sumusunod nga Henerasyon, Atong Ampingan!

Sa adlawng Marso 14, gisaulog sa tibuok kalibutan isip ika-13 Internasyunal nga Adlaw sa Paglihok Batok  sa mga Dagkong Dam, Alang sa mga Kasapaan, Tubig ug Kinabuhi, (International Day of Action Against Dams  and For Rivers, Water and Life) samtang diri sa atong Dakbayan ginasaulog nato ang ika-73 nga Araw ng  Davao.

Mahinungdanon gayod kanato ang mga kasapaan ug mga dagkong suba nga sama sa Davao River - makasaysayon  kini tungod kay saksi ug kabahin kini sa pagtumaw sa mga sibilisasyon, sa pagkatukod sa mga karaang  komunidad sa atoang mga katigulangan. Anaa sa daplin sa sapa namuyo ug nagpanday sa ilang mga komunidad  ang atong mga ninuno, ang mga lumad ug mao kini ang pagkahimugso sa atong Dakbayan.

Niining mahinungdanong adlaw, angay lamang nga atong hinomduman ang makasaysayanon ug mahinungdanong  papel sa Davao River sa atong pagka-Dabawenyo tungod kay ang maong sapa saksi sa pagbatok sa katawhang  lumad batok sa mga langyawng manunulong aron lamang panalipdan ang atong yuta, ang Davao.

Sa kamahinungdanon sa sapa dili lang sa atong kasaysayan kundili sa mismo natong kinabuhi, angay lang  nga magmatngon kita sa pagpreserba sa atoang mga katubigan ug kasapaan, isip usab  dakong bahin kini sa  giila natong  kinaiyahan.

Apan subo pamalandungon nga sa kasamtangang panahon anaa sa dakong peligro ang atong mga kasapaan ug  rekurso sa tubig tungod sa mga kadaot nga mugna sa tao.

Taliwala sa deklarasyon sa gobyernong Arroyo nga nagbutang sa Mindanao ilalom sa 'state of calamity'  mahitungod kunohay sa krisis sa enerhiya, ang katawhan kinahanglan magmabinantayanon tungod kay lakip  niini ang mga hulga batok sa atong mga kasapaan, katubigan, kinaiyahan ug katungod.

Luyo sa maong deklarasyon, mamahimong mapadayon ang mga pagtukod og mga higanteng dam ug pagbaligya nga  mamahimong pribado na ang mga water districts sa tibuok nasud, labi na kining mga ania sa Mindanao.  Dinhi sa Davao,  kini nga deklarasyon makahatag og rason nga  matukod ang dugay nang gibabagan nga  proyektong hydroelectric dam sa HEDCOR-ABOITIZ dinha sa Tamugan-Panigan- Suwaan Watershed. Ang maong  watershed giila og gideklara nga mga “reservation area” diin ginadili ang bisag unsang proyektong  pangkalambuan nga mamahimong hinungdan sa dakong kadaot sa mga kasapaan.

Gawas pa niini, mamahimo usab kining gamiton nga rason sa Davao City Water District (DCWD) aron iduso  ang dugay na niining plano nga mangutang aron ipondo sa surface water project nga mogamit gihapon sa  kasapaan sa Tamugan. Kining maong proyekto mupadulong sa pribatisasyon sa DCWD nga mahimong hinungdan sa  pagtaas sa balayrunon sa tubig ug modungag sa kalisud sa katawhan.

Ang deklarasyon sa gobyerno nga ibutang sa state of calamity ang Mindanao dakong hulga ug peligroso  ilabi pa nga gikan kini sa kamot sa usa ka pangulo nga nangambisyon nga magpabilin sa gahum taliwala sa  kaylap ug kusog nga pagbatok sa katawhan ug ang dugay na nga panawagan sa katawhan nga tiunay nga  kabag-ohan sa pulitika.

Tin-aw sa katawhan nga wala'y laing motibo kining bag-ohay lamang nga deklarsayon gawas sa pwedeng  kurakuton ang dakong calamity fund aron magamit alang sa politikal nga ambisyon sa Panggamhanang Arroyo  ug mga alyado niini. Usa kini ka hulga sa muabotay nga eleksyon nga maoy makababag sa tinguha sa  katawhan nga bag-ong tipo nga pulitika nga tiunay nga naga-serbisyo sa katawhan.

Busa among gina-awhag ang katawhan nga mag-hiusa batok sa deklarasyon nga nagbutang sa Mindanao ilalom  sa state of calamity.

Panalipdan ang atong mga kasapaan batok sa mga kapitalistang dam. Babagan ang pribatisasyon sa mga water  district.  Tubig alang sa kinabuhi ug katawhan dili alang sa ganansya sa pipila.