Grupo sa mga drayber ug opereytor mialma batok dugang bayronon, mibahad og dakong protesta

Dakbayan sa Dabaw- Mipadayag og kasuko ang grupo sa mga drayber ug opereytor niining dakbayan batok sa pagpatuman sa Land Transportation Office sa Executive Order 197 nga maoy direktiba aron patas-an ang singil sa Motor Vehicle Users Charge kon MVUC.

Sa maong mandato, misaka ang bayronon sa mga opereytor sa tricycle sa duha ka libo (P2,000) gikan sa 300 pesos samtang ang mga dyip ug multicab mubayad usab og dos mil gikan sa 600 pesos nga kanhing bayad sa MVUC kun magparehistro sa LTO.

Matud kang Edil Gonzaga, Tigpamaba sa Transport of Southern Mindanao for Solidarity Independence and Nationalism (TRANSMISION-PISTON) ang maong usbaw sa bayronon makapadugang sa kalisod sa mga drayber ug opereytor hilabina na nga walay hunong ang pagtaas sa presyo sa lana inubanan sa pagtaas usab sa presyo sa mga batakang palaliton.

Sa petisyon nga gisang-at sa mga drayber ug opereytor sa LTO nga gipanguluhan sa TRANSMISION PISTON, ang maong grupo nanawagan sa pagbasura sa EO197 ug sa RA 8794 tungod kay dugang kini pagpalisod sa mga drayber ug opereytor.

Dugang pa ni Gonzaga, “Nganong kita man intawong mga kabus ug walay klarong kita ang pabug-atan og samot sa gubyerno? Nganong dili man resolbahon sa Aquino administration ang korapsyon aron ang kwarta sa katawhan magamit sa pagpaayo ug pagmintina sa mga kalsada?”.

Mibahad ang TRANSMISION-PISTON nga magpahigayon kini og mga dagkong lihok protesta kung dili wagtangon sa gubyerno ang maong mandato.

Duha ka semana na ang milabay gikan nagpahigayon ang kapin 150 ka mga drayber ug ang TRANSMISION-PISTON og piket sa LTO aron babagan ang pagpataas sa bayronon sa MVUC. Bag-ohay na sab nga ang konseho sa Dakbayan sa Dabaw mipasang-at og resolusyon aron suportahan ang panawagan sa mga drayber ug opereytor batok sa usbaw sa bayronon sa MVUC.