Kadamay, miprotesta batok sa hulga sa demolisyon sa Bangkerohan

Davao City | 2010 June 3 | Gunit ang mga panawagan nga naka-pintura sa sako, mipahigayon ug lihok protesta ang grupo sa progresibong Kadamay ug 80 ka myembro sa Madapo Riverside Settlers Neighborhood Association aron mopadayag sa pagbatok sa hulga sa ilang demolisyon.

Gihatag sa sheriff mga lumulopyo sa tulo ka ektaryang yuta tapad sa sapa sa purok 9, brgy 8-a, ang Final Notice to Vacate pabor sa nagaangkon sa yuta nga mao ang JOCAR Development Corporation nga gipanag-iyahan sa mga Tongson. Nagsugod ang kaso sukad pa niadtong tuig 2004; wala nadayon ang pagpahawa kanila sa milabay'ng unom ka tuig human sa serye sa mga lihok protesta ug negosasyon tali sa mga lokal nga opisyales sa gobyerno .

Giduso sa kapin 400 ka pamilya nga myembro sa MRSNA nga sila ang tinuod nga nanag-iya sa yuta tungod kay sukad 1941 pa sila nagpuyo dinhi. Taliwala sa interbensyon sa lokal nga panggamhanan, gipresyohan sa mga Tongson ang maong luna sa  P2000 kada metros kwadrados, mas taas kaysa sa presyo nga P250/square meter nga kaya paliton sa siyudad. 

“Ania kami dinhi aron ipadungog sa Local Housing Board ang among kahigwaos  ug muhangyo kanila nga gamiton ilang gahum aron panalipdan ang katungod sa mga kabus sa lungsod sa kaugaling yuta ug seguridad sa pamuyo. Nagahangyo usab kami sa atong halangdong Mayor nga kami tabangan  sa among kahimtang kay kami nagabarog aron panalipdan ang among mga katungod," sumala ni Elena Bariquit, presidente sa MRSNA.

Matud ni Franchie Buhayan, tigpamaba sa KAMADAY, “Dili kini himolag sa mga ginabuhat na sa mga dagkong agalong yutaan sa tibuok nasud nga gipahimuslan ang mga mag-uuma sa kabukiran ug sa mga kabus sa lungsod. Ginahagit namo ang lokal nga panggamhanan nga mobarog alang sa katungod sa katawhan sa balay, yuta ug panginabuhian. ”

Miuban usab sa protesta ang mga militanteng kabatan-onan. “Taliwala sa mga isyu sa edukasyon sama sa nagkagrabe ug tinuig nga pagsaka sa matrikula, ang kabatan-onang kabus naga-atubang pa  og mga problema sama niining demolisyon. Daghang mga kabatan-onan nga nag-eskwela duol sa maong komunidad sa Madapo ug nanginabuhi duol sa Bangkerohan,” matod kay Sheena Duazo, tigpamaba sa grupong Kabataan sa Davao City.#