Pagpakamalaut Sa Pagpatay Kay Benjie Bayles

DIOCESE OF NEGROS OCCIDENTAL, Iglesia Filipina Independiente, Cathedral of Saint John the Baptist, BONIFACIO, Gonzaga streets, Bago City, Negros Occidental, Philippines | There is only cursing, lying and murder, stealing and adultery; they break all bounds, and bloodshed follows bloodshed.  ----  Hosea 4:1-3; Bloodthirsty men hate a man of integrity and seek to kill the upright. -------  Proverbs 29:9-11

Subong nga nalubong na ang bangkay ni Benjie Bayles, wala sang katapusan namon nga ginapakigbatu ang kamatuoran tuhoy sa iya pagkamatay agud nga ang mga may kahimuan mabilanggo sa rehas sang hustisya.

Si Benjamin E. Bayles, ukon Benjie sa pagkakilala sang iya mga abyan kag himata,  44 ang edad, taong simbahan kag lay minister sang Parokya ni San Ramon Nonato sa Brgy. Suay, Himamaylan City. Nagpanugod bilang isa ka sacristan sang tion anay ni Rev. Fr. Romeo Tagud sadtong tuig 2000. Ang iya nga pagbuylog sa hilikuton sang simbahan nagapakita sang iya daku nga pagtuo sa Dios kag pagigugma sa iya nga isigkatawo ilabi na gid ang mga kubos, imol, ginapigos kag ginahimuslan. Amo man sini nga balatyagon ang nagduso sa iya sa pag-isa sang iya kaugalingon sa masingki nga paghimakas sang mga mangunguma para sa duta kag hustisya. Ang mga organisasyon nga iya ginapakigbahinan amo ang ang masunod:  September 21 Movement, ang organisyon sa Sur nga bahin sang Negros nga nagadampig sa tawhanon nga kinamatarung; National Federation of Sugar Workers (NFSW), kag sang Bayan Muna Partylist.

Ang iya kabuhi bilang Kristiyano nagapakita sang iya Aglipayano nga pagtuluohan kag spiritualidad: Pro Deo et Patria (Para sa Dios kag Pungsod). Siya amu ang  District Chairman kag Coordinator sang Aglipayan Forum,   orgisasyon sa diocese nga nagatib-ong sang nasyonalismo kag makahililway nga pagtuon (liberating education) nga nagahatag sang unod sa rebolusyonaryo nga kinaiya sang IFI.

Para sa iya nga mga abyan kag himata si Benjie isa ka mapinalanggaon, madinumdumon, malipayon, but-anan nga tawo.  Apang tungod sang iya wala nagakalingkang nga suporta para sa kawsa sang mga kubos, imol, ginapigos kag ginahimuslan ini nagtuga sang kaakig sa mga ahente sang estado nga nangin tuna-an agud siya pagapasibangdan bilang katapu sang NPA. Pero suno sa iya anay kura paruko nga amu si Fr. Benjamin Duran nga nakakita kon paano naghamtung si Benjie sa iya spiritwal kag sosyal nga  aspeto nagahambal nga ang pag-ugyon ni Benjie sa paghimakas sang mga mangunguma nagaangot sa programa sang simbahan nga amo ang pakig-isa sa paghimakas sang mga mangunguma kag mga mamumugon para sa kabuhi nga may kabuganaan. Madamo na sang pag pamahug sa seguridad kag kabuhi ni Benjie, apang kasubong sang isa ka matuod nga kristiyano wala ini nagpahuyang sa iya sa pag-alagad sa mga ginpatumbayaan sang sosyedad.

Hunyo 14, 2010 isa ka malaut nga adlaw para kay Benjie. Nagabantay siya sadto sang salakyan sa Purok Antolo, Brgy. Suay, Himamaylan City sa takna 4:30 sang kahapunanon sang may 2 ka tawo nga nakahelmet, nagasakay sa itom nga Honda TMX 155 nga wala sang plaka. Ang nagaangkas nanaog malapit sa iya kag sang may 3 metro na ang antad kay Benjie iya ini gintiro sa nagkalain-lain nga bahin sang lawas. Sang matumba na si Benjie ginpanaugan pa gid sang driver kag gintiro sang makapila ka beses agud mapasiguro gid ang iya kamatayon. Dayon ang mga manugpaslang nagpalagyo sakay sa ila motorsiklo. Apang, sang sadto man nga tion ang isa ka nagatrabaho sa gobyerno nga nakakita sang hitabo nagtawag dayon sa iya kilala sa Himamaylan City Philippine National Police (PNP) agud ireport ang insedente. Gilayon nga ginpaalerto sang Himamaylan City PNP ang malapit nga Kabankalan City PNP agud mag set up sang check point kag didto nadakpan sanday Roger M. Bajon kag Ronnie L. Caurino.  Nakuha sa duha ang 2 ka .45 caliber nga pistol. Ang  Kabankalan police,  sa ila spot report kag statement sa DYEZ “Aksyon Radyo” Bacolod nagsiling nga ang mga nadakpan nag-aku nga kabahin sila sang  “organic” nga katapu sang Philippine Army.

Ang Diocese sang Negros Occidental mabaskog gid nga nagakondenar sang makasiligni nga kamatayon ni Benjie Bayles.  Suno pa sa autopsy report, may ara nga 25 ka pilas kag may 21 ka bala nga nasapwan sa iya lawas.

Anu gid bala ka daku sang sala nga nahimo ni Benjie sa sini nga mga tinuga agud patyon siya sa sini ka makakulugmat nga kamatayon? amu bala ini ang kabaylo sang iya wala nagakalingkang nga suporta sa kawsa sang mga kubos, imol, ginapigos kag ginahimuslan sang komunidad?

Ang masakit pa sini siya ginpatay sang militarya. Ang AFP nga amo kuntani ang nag panumpa nga ipakigbato kag protektahan ang tawhanon nga kinamatarung sang pumuluyo nagapangatubang subong sang asud asud nga panumbungon sang linibo ka pagpamatay, pagpangsalvage, pagpang-abduct kag iban pa nga porma sang paglapas sang  tawhanon nga kinamatarung. Subong may ara masobra sa 1200 ang ginpamatay kag masobra sa 280 ang gin-abduct apang wala bisan isa ang napamatbatan sa sini nga mga krimen. Nagapakita lamang ini sang isa ka polisiya sang estado nga ang tanan nga nagapanindugan para sa kamatuoran, hustisya, kag paghidaet pagapatyon. Ang kultura sang pagpamatay nga ginabasbasan kag ginapahanugutan sang mataas nga lideres sang pungsod amo ang pinakamalaut nga palanublion nga igabilin sang administrasyon ni Gloria Macapagal Arroyo.

Ang paghimakas ni Benjie kag sang mga mangunguma nga iya ginsumpaan nga pagaunungan, paghimakas sang bug-os nga simbahan Iglesia Filipina Independiente. Ang pagpakig-away para sa kamatuoran kag hustisya indi lamang away politika.  Ang pagpakig-away para sa kamatuoran kag hustisya isa ka moral kag spiritwal nga away nga dapat ang simbahan magpanindugan.   Sa sini nga madulom nga mga inadlaw, ang mga krimen sang estado batok sa katawhan nagapahanumdom sa aton sa mga martires sang simbahan nga wala kaluoy nga ginpamatay ilabi na gid sila ni Fr. Nardiso Pico, Fr. William Tadena, kag Obispo Maximo Alberto Ramento.  

Ang Diocese sang Negros Occidental mabakod nga nagapakamalaut sa mga pagpasibangod kag akusasyon sa amon simbahan sang mga militarya kag mga ahente sang estado nga ang  Iglesia Filipina Independiente prente sang mga organisasyon komunista subong nga ila sini ginahambal sa madamo nga mga kampanya sang militarya batok sa insurhensya. Ini nga mga pagpatupatu kag puno sang kabutigan nga pagpasibangod sang militarya nagadulot lamang sang isa ka kahimtangan nga ang amon mga tumuluo mabutang sa bibi sang asud-asud nga pagpang-atake kag pagpang-abuso sang terorismo sang estado. Isa ini ka pagpakita sang wala pagrespeto sa simbahan sang Dios.

Ang amon pagtuo sa Isa kag Nagakabuhi nga Dios sang Kahilwayan kag Kaluwasan nagatulod sa amon sa dugang kag mas madalum nga paghimakas agud nga hilwayon ang katawhan sa tanan nga porma sang indi makitawhanon nga kahimtangan, kag bangud sang sini nga panindugan amon man mabaskog ginkondenar ang pagpamatay sang mga nagaduso sang kalinungan kag  nagapakigbato para sa tawhanon nga kinamatarung subong sang taong simbahan, journalists, lawyers, judges, health givers, kag miembro sang mga militante nga mga organisasyon. 

Kami nagapati nga ang epektibo kag matawhay nga pamaagi sa pag pauntat sang insurhensya sa Pilipinas indi ang pagpamatay sa mga pumuluyo.  Amon ginapanawagan sa kay  presidente Aquino nga magbalik sa pagnegosasyon para sa kalinungan sa tunga sang Government of the Republic of the Republic of the Philippines kag National Democratic Front of the Philippines suno sa ginkaisahan sa Hague Declarations.

Sa sining tion sang kasubo kag kaakig, bilang inyo Obispo akon ginapanawagan sa tanan nga mga kaparian kag tumuluo nga magpangamuyo kag magmabinantayon agud mahatagan sang hustisya ang kamatayon ni Benjie Bayles kag agud nga ang mga nagpatay sa iya kag ang mga sa likod sini mapamatbatan. Madamo na kita sang may ginhalad nga kabuhi sa altar sang kahilwayan, ini dapat mangin inspirasyon naton agud sa mas madalum nga pag-usoy sa dalan padulong sa matuod-tuod nga kahilwayan kag paghidaet nga nasandig sa hustisya. Bilang isa ka Lawas ni Kristo, dapat sa liwat aton nga tamdon kag unungan ang pumuluyo sa ila nga paghimakas. Gub-on naton ang kultura sang pagpakalinong kag dapat mabatian sang tanan ang aton mga pagpanghakroy kag singgitan.  Maghambal ka para sa tanan nga indi makahambal, kag pangapinan mo ang kinamatarung sang mga kubos kag mga ginpatumbayaan (Binuhatan 31. 8). 

Pro Deo et Patria
(Sgd) THE RT. REV. FELOMINO N. ANG
Interim Bishop