Polyeto: Babagan ang Pagbaligya sa Mt. Diwalwal!

Ang bukid sa bulawan, Mt. Diwalwal, maoy pinuy-anan sa libohan ka mga gagmay’ng minero ug kabus nga mag-uuma ug mga lumad. Nahimong unod sa mga balita karong bulana ang Diwalwal tungod sa public bidding nga pagahimoon sa gobyerno aron ibaligya na ang bukid sa bulawan sa mga dagkong langyaw ug lokal nga mga minero.Ang Philex Mining Corporation, usa sa pinakadako nga kumpanya sa mina sa nasud, maoy gibalita nga buot mopalit sa konsesyon sa 729 ektarya nga minahan sa Diwalwal. Ang uban pang korporasyon nga buot mopalit sa maong yuta mao ang APC Group Inc./South China Resources Inc., Carrascal Nickel Corporation, ug ang higanteng inprastraktura nga FF Cruz & Co. Inc.

Niadtong Nobyembre 25, 2002, ang gobyernong Arroyo nagdeklara sa Presidential Proclamation 297 aron kuno ipatuman ang pagkolekta og buwis ug aron kuno masolusyunan ang problemang polusyon sa sapa sa Naboc. Gideklara mismo ni Gloria Macapagal Arroyo ang 8,100 hectares sa Mt. Diwalwal isip mineral reservation ug environmentally critical area.

Pinaagi sa PP 297, namugna ang Natural Resources Mining Development Corporation o NRMDC nga karon gitawag na nga Philippine Mining Development Corporation (PMDC) nga maoy direktang nagdumala sa operisyon sa mina sa “Diwalwal Mineral Reservation.”  

Sukad pa sa pagdumala niini, kanunay na anaa sa kakuyaw ug kawalay seguridad sa panag-iyahan ang mga residente nga anaa sa Diwalwal. Aduna nay mga hungihong nga pahawaon ang mga residente sa ilang pinuy-anan. Niining nangagi, giisbog sa makapila kahigayon ang public bidding tungod sa mga protesta ug mga kabalaka mismo sa lokal nga panggamhanan, mga suportang grupo, mga mag-uuma, Lumad ug mga minero nga maoy direktang maapektohan.

Dakong bakak ang gapasiatab sa PMDC nga walay mapahawa nga residente sa Diwalwal sa pagsugod sa operisyon sa dagkung pagmina. Sama sa nahitabo sa uban pang mga lugar nga gisudlan sa dinagkong pagmina, pugos nga napahawa ang mga residente tungod sa hulga sa landslide ug uban pang kadaot sa kinaiyahan, kawalay panginabuhian.Ang gipahambog niini nga Terms of Reference (TOR) diin gilatid kuno ang mga kondisyon sa pagsulod sa dagkung pagmina sa Diwalwal usa ka way unod nga kasabutan nga ang bugtong tumong mao ang pagpahilom sa kabalaka ug lehitimong pakigbisog sa katawhan.

Walay kalahian ang langyaw ug lokal nga dagkung kapitalista tungod ang ilang susamang tumong mao ang walay puangod nga pagpahimulos sa bahandi sa atong kinaiyahan ug kusog ilalom sa korap nga presidente Gloria Arroyo, nabulit kaniadto pa man sa lain-laing kaso sa korapsyon ug pagbaligya sa nasudnong bahandi alang sa ilang kaugalingon interes.

Busa, ang public bidding naghatag lamang kanato og dakung pagduda tungod sayod kita nga dili kaayuhan sa katawhan ang siguradong magmadaugon.

Damgo lamang ang ginapasiatab sa PMDC nga moasenso ang katawhan sa pagsulod sa dagkung pagmina sa atong barangay. Asa sa tibuok Pilipinas diin nag-opereyt ang mga langyaw ug lokal nga dagkung kapitalista nga nakatagamtam og tinuod ug maluntarong haruhay sa kinabuhi ang mga yanong abantero, minero, ug uban pang mga mamumuo ug mga sama natong molupyo? Kalisod, sakit ug kawalay panginabuhian, dislokasyon ug pagkaguba sa atong kinaiyahan ang dili malikayang dangatan sa katawhan samtang bilyones pesos ang kinitaan sa kapitalista ug labaw pang maadunahan ang mga korap nga anaa sa panggamhanan.

Ang pagkusog sa operisyong militar, pagbubo og mga bag-ong batalyon ug pagdaghan sa mga detachments sa mga sundalo ug pulis sa atong barangay alang kini sa pagpaniguro nga mahadlok kita nga molihok aron babagan ang mga plano sa kapitalista ug sa mga panggamhan. Ang nahitabo sa mga silingan nato nga gitawag karong Monkayo 13 (ang 13 ka inosenteng sibilyan nga gidakop, gikulata, gipreso ug malisyosong gikasuhan sa 25IB-AFP niadtong Marso) ug uban pang mga pagpanglapas sa tawhanong katungod mograbe lamang sa pagsulod sa kapitalista sa dagkung pagmina sa Diwalwal.

Busa, ang katawhan kinahanglan magbinantayon ug maghiusa aron panalipdan ang katungod sa panginabuhian, hilabina nga wala kitay kasegurohan nga maprotektahan ang mga katungod sa gagmay’ng minero ug mag-uuma ilalom sa bag-ong panggamhanan ni Pres. Noynoy Aquino.

KATAWHAN MAGHIUSA!

BATUKAN ANG PAGSULOD SA LANGYAW UG LOKAL NGA DAGKUNG KAPITALISTA SA PAGMINA!

PAKIGBISOGAN ANG KATUNGOD SA PANGINABUHIAN UG PAMUYO!

PANALIPDAN ANG YUTANG KABILIN UG KINAIYAHAN!

NAGKAHIUSANG KATAWHAN SA DIWALWAL (NAGKADIWA)