Singgit sa Anakpawis: Gloria Pahawa!

May 1, 2010 | Tapuson ug Patubagon ang Rehimeng US- Arroyo! Iasdang ang Nasudnon ug Demokratikong Pagbag-o! Pakigbisogan ang Panginabuhian ug Nasudnong Katungod! Pakigbisogan ang P125 dugang suholan sa mga mamumuo sa tibuok nasud!

Lay-off, kontraktwalisasyon, union busting, wala pag remit sa SSS benefits, militarisasyon ug pagpanghasi sulod sa empresa, pagpanghulga ug pagpamatay sa mga miyembro ug lider sa mga unyon. Pipila lamang kini sa mga dili makitawhanong tubag sa gobyernong Arroyo sa katawhang mamumuo.

Sulod sa 124 nga tuig nga pagsaolog sa Mayo Uno Pangkalibutanong Adlaw sa Pamuo, walay kabagohan sa kinabuhi sa mga mamumuo. Gani, nagkagrabe pa ang kahimtang sa ilang mga pamilya--walay pag-usbaw sa suholan ug  nagbaguod ug nagpasingot sa trabaho samtang ang mga kapitalista nisamot og kaadunahan.

Dugay na nga paningkamot sa katawhang mamumuo nga ma-aprubahan ang P125 usbaw sa suhulan apan nagpabiling buta-bungol ang papet, diktador, pasista ug kurakot nga rehimeng US-Arroyo.

Tubag sa mga mulo sa katwhang mamumuo walay lain kundili ang nagka lain-laing mga kontra-mamumuo nga mga balaod ug palisiya. Usa na niini mao ang Department of Labor and Emplyment (DOLE) Advisory #2 mahitungod sa Guidelines on the Adoption of Flexible Work Arrangements” nga mao kuno kini ang muhatag og tabang ug remedyo sa mga mamumuo sa panahon sa krisis sa ekonomiya.   Usa lamang kini ka iskema aron iligalisa ang mga kontra-mamumuo nga mga palisiya ug uban pang praktis nga kontra mamumuo. Samot niini nga hatagan og gahum ang mga kapitalista aron padayunong abusuhon ug pahimuslan ang mga mamumuo.  Giligalisa lamang sa maong balaodnon ang  pugos nga pag-overtime, dili makatao nga oras sa pagtrabaho ug kulang nga oras sa pagpahulay sa mga mamumuo sa pamilya, taas nga oras ug ubos nga suholan, sayon nga pagbalhin-balhin sa mga mamumuo ug sayon nga pamaagi sa pagtangtang kanila.

Gawas sa DOLE Advicory #2 nga gisagpa sa panggamhanang US-Arroyo sa hut-ong mamumuo, anaa usab ang wala pag remit sa SSS benefits sa mga mamumuo sa mga probinsya sa Southern Mindanao Region. Sama sa mga mamumuo sa banana plantation sa Compostela Valley nga kun diin ang mga trabahante sa Packing Plant 98, Osmena, adunay 175 ka mga trabahante nga wala gihatagan sa ilang SSS benefits sukad tuig 2000 hantod sa kasamtangan. Sa Davao Del Norte, ang 900 ka mga mamumuo  sa MARSMAN wala usab nakadawat sa ilang mga benepisyo gikan sa SSS sukad tuig 2007 hangtud sa kasamtangan.

Sa pikas bahin, samtang nagkaduol na ang bugnong lugaynon,  minilyon nga mga mamumuong Pilipino ang mubotar sa umaabot nga Mayo 10 nga nangandoy nga mabag-o ang kahimtang ug masalbar sila sa kumunoy sa  pagkaulipon ug kakabus. Adunay 38 ka milyong Pilipino ang nagrepresentar sa hut-ong mamumuo sa tibuok nasud nga dili angay ipakawalay bili sa bag-ong administrasyon.

Tanan nga mga nidagan isip Presidente sa nasud nagkaingon nga kuno sila para sa mga kabus ug mapitol na ang kalisod sa katawhan ug korapsyon kung sila mamahimong presidente. Apan unsa man ang gusto sa mga mamumuo nga tubagon sa mga nangandoy nga mahimong lider sa atong nasud?  Kinahanglan tubagon ang mga nag unang lehitimong demanda ug mga isyu sa mga mamumuo nga dugay na nga gipakisbisogan apan hantod karon wala gihapon nahatagan og bisan gamay nga kasulbaran. Sama sa ubos nga suholan, walay kasiguradohan sa trabaho, walay trabaho, ug wala pag remit sa mga benepisyo, dili maayo nga kondisyon sa mga mamumuo sa ilang pagpanarbaho ug uban pang mga paglapas sa katungod sa mga mamumuo.

Busa kita mga Anak sa Pamuo, gikinhanglan nga suportahan lamang ug botohan ang mga kandidato nga adunay kaamguhan nga ipasa ug ipatuman ang 125 dugang suholan sa tibuok nasud para sa mga mamumuo, mudepensa ug mu-protekta sa mga katungod sa mga mamumuo, mubasura sa mga palisiyang kontra-mamumuo, pag-kontrol sa mga presyo sa mga palaliton, pag pataw og disiplina sa mga dagkong kumpanya nga mag overpricing sa mga batakang palaliton ug serbisyo, pagsuporta sa paglingkawas sa lokal nga ekonomiya dinha sa padayong pag-agad sa langyaw’ng kapital ug baligyaanan, manawagan og hustisya alang sa tanang biktima sa pulitikanhong pagpitol sa rehimeng Arroyo.

Para sa mga umaabot nga mga bag-ong lider sa nasud, dili na kita musogot nga buhaton sa makausab ang mga pagpalisod ug paglapas sa katungod sa katawhan nga binuhatan sa administrasyong Arroyo. Sulod sa siyam ka tuig ilalom sa peke, korap, ug kontra-katawhan nga rehimen, gipakawalay bili ni Arroyo ang mga lehitimong demanda sa mga mamumuo. Sa paghinomdom sa katawhan sa ika-124 nga tuig sa adlaw sa pamuo, singgit sa mga mamumuo: Tama na ang siyam ka tuig nga pagpalisod sa katawhang Pilipino. Tama na ang siyam ka tuig nga pagpalisod sa hut-ong mamumuo.

 
Panginabuhian ug Katilingbanong hustisya PAKIGBISOGAN!

P125, Dugang Suholan tibuok Nasud IPATUMAN!