Tubig Alang Sa Kinabuhi Ug Alang Sa Katawhan

Babagan Ang Makadaot Nga Proyekto Sa HEDCOR – DCWD SA TAMUGAN–PANIGAN River!

Ang TUBIG adunay dakong bili sa atong KINABUHI. Lapad ang hinungdan sa pagkabuhi sa tawo. Ang tanang naay kinabuhi diri sa kalibutan nabuhi tungod kay adunay tubig. Ang esensya sa tubig angay lamang nga magpabilin isip nagahatag og kinabuhi ug wala nay lain pa. Ang kaabunda niini mahinungdanon sa pagkabuhi sa tawo ug sa paglahutay sa kinabuhi sa kalibutan nga atong gipuy-an.

Karong Marso 22 gisaulog sa tibuok kalibutan ang World Water Day diin ang tanang katawhan ilabi na ang kitang katawhang kabus nagaduso sa atong katungod alang sa limpyo ug barato nga serbisyo sa panubig ug ang pang-amping sa atong kinaiyahan.
 
Sa kasamtangan, adunay mga nagkalain-laing isyu ug mga kabalaka nga krusyal sa atong kinabuhi ug kinaiyahan. Adunay hulga nga bag-ohon ang "balaod sa tubig-saluran" o (Watershed Code) sa Tamugan River nga giiliang usa ka protected area. Bag-ohon ang maong balaudnon aron itugot na nga mahatagan  og katungod sa tubig ang bisan kinsang entidad, pribado man o publiko,ug gilambigit kini sa krisis sa enerhiya nga gideklara nila ni Angelo Reyes sa Dept. of Energy ug ni Defense Chief Norberto Gonzales – pulos mga tawo ni Gloria Arroyo.

Apan kami sa PANALIPDAN, Consumer Alert, ug KATRIBU PARTYLIST hugot nga nagatuo nga ang tubig ug ang gigikanan niini dili angay panag-iyahan sa pribadong entidad o sa mga pipila ka mga indibidwal lang nga adunay dakong interes nga pahimuslan kini ug gamiton aron himuong dakong negosyo ug pangkwartahan.

Kitang mga konsumerante sa dakbayan sa Dabaw, angay lang maghiusa ug hugot natong batukan ang mga planong proyekto sama sa Hydropower Plant nga ibutang sa  Davao City Tamugan-Panigan River nga gipasiugdahan sa Hydroelectric Development Corporation (HEDCOR) - ABOITIZ ug sa Davao City Water District (DCWD) nga tataw kaayong makadaot sa dugay nang giampingan natong kasapaan.

Gikinahanglan ang hingpit nga pagpanalipod sa suba, tubig-saluran ug kinaiyahan ilabina karon nga ang ang atong mga isigkatawo sa Luzon naghiagom tungod sa bagyong Ondoy ug Pepeng.

Ang hanyag nga proyekto sa HEDCOR sa Tamugan River angay lamang nga dili tugtan kay tungod gilapas niini ang Davao City Watershed Code og hulga kini sa kinaiyahan. Ang ginansya sa kompanaya sukwahi sa tumong sa Tamugan River nga alagaran ang interes ug kaayohan sa katawhan.

Sa susamang paagi, ang plano sa DCWD nga gamiton ang Tamugan River para sa surface water usa ka pagpanglapas sa watershed code

Gilantaw sa PANALIPDAN, KATRIBU partylist ug Consumer Alert nga ang surface water development program sa DCWD makahatg og dalan sa sell-out sa kompanya. Ang “new loan package program” sa Local Water Utilities Administration (LWUA) gigamit sa DCWD management aron pinansyahan ang Comprehensive Mainline Replace Program (CMRP) niini. Niadtong 2007, nag-apply og loan nga P100million ang DCWD management nga gibatukan sa union sa DCWD tungod kay ang pag-loan maghatag og dalan sa pribatisasyon.

Ang planong utang nga eskema sa DCWD parte sa nasudnong polisiya ug programa sa  gobyernong Arroyo aron ibaligya ang mga assets sa estado ug awhagon ang partisipasyon sa pribadong sector sa ekonomiya ug kinabuhi sa atong nasud.

Ang 2004-2010 Medium Term Philippine Development Plan sa gubyernong Arroyo nag-punting og ambisyosong target alang sa serbisyo sa tubig sa iyang Philippine Millenium Development Goals nga gi-awhag sa mga pribadong korporasyon aron pinansyahan ang mga water district sa tibuok nasud. Aron matinuod kini, gipirmahan ni Pres. Gloria Macapagal Arroyo ang EO No. 279 nga gire-organize sa LWUA aron pakusgon ang impluwensya sa mga pribadong korporasyon ug Int’l financial Institutions (IFIs) susama sa World Bank(WB), Asian Development Bank (ADB) ug Japan Bank for International Cooperation (JBIC) sa mga operasyon niani pinaagi sa "loan arrangements and conditionalities” susama sa ”rationalization of provincial water service” o pribatisasyon.

Gani, ang surface water development sa DCWD usa ka lakang sa malahutayong pagpanagiya sa pribadong sector sa mga water district. Ang DCWD mamahimong mahuman susama sa MWSS, ug water utilities sa Cebu, Cagayan de Oro, Olongapo, La Union ug Tagbilaran.

Kung ang water utility mamahimong pribado, dahumon na daan nga ang water rates mutaas sa kasabog nga gidikta sa korporasyon. Susama gihapon kini sa mga nasinati natong pagtaas sa presyo sa lana, elektrisidad, matrikula ug mga batakang palaliton.

Buot namong irehistro ang among pagsalikway sa mga proyekto nga gi-awhag sa HEDCOR ug DCWD sa Tamugan River. Ang Tamugan River angay nga magpabiling preserbado alang sa mas dakong tumong. Walay kamadalian sa surface water development program sa DCWD kay tungod walay krisis sa tubig. Sa maong rason pud dili kinahanglan ang hydropower plant project sa HEDCOR.

Among ginaduso ang among oposisyon sa hydropower plant project sa HEDCOR-ABOITIZ ug surface water development sa DCWD ug buot namomg irehistro ang among mga panawagan nga:

1.       Kanselahon ang water rights permit nga giganti sa DCWD ug HEDCOR

2.       Dili tugtan ang utang nga giplano sa DCWD nga maghatag dalan sa pribatisasyon sa water utility

3.       Ituboy ang Davao City Watershed Code nga nagbawal sa bisag unsang katikarang pangnegosyo  sa Tamugan – Panigan watershed;

4.       Ihunong ang mga proyekto nga anaa sa gambalay sa Philippine Energy Plan nga muresulta sa pagkadaot sa kinaiyahan ug sa mga mahinungdanong suba ug tubig-saluran.

5.       Iduso ang malungtaron ug tinuod nga solusyon sa climate change! Ipatuman ang tinuod nga repormang agraryo ug rehabilitasyon sa kabukiran

 
PANALIPDAN, Consumer Alert, ug KATRIBU PARTYLIST
Marso 25, 2010